نئی دہلی8اکتوبر (ایس او نیوز؍ آئی این ایس انڈیا )آنے والے پانچ ریاستوں کے اسمبلی انتخابات میں جیت کی امید لگائے بیٹھی بی جے پی کو دھچکا لگ سکتا ہے۔ مدھیہ پردیش ، راجستھان، چھتیس گڑھ، میزورم اور تلنگانہ میں اسمبلی انتخابات کی تاریخوں کے اعلان کے بعد نجی ٹی وی اے بی پی نیوز سی ووٹر کا اوپینین پول ایک طرف جہاں بی جے پی کے بری خبر لے کر آیا ہے، وہیں کانگریس کے لئے اچھی خبر لے کر آیا ہے۔ اسمبلی انتخابات کے پیش نظر یہ اوپینین پول بی جے پی کے لئے درد سر بڑھانے ولا ہے۔ راجستھان، مدھیہ پردیش اور چھتیس گڑھ کے لئے کرائے گئے اس سروے میں تینوں ہی ریاستوں میں بی جے پی کے ہاتھ سے اقتدار کھسکتی نظر آرہی ہے اور تینوں ہی ریاستوں میں کانگریس کو اکثریت حاصل ہوتی ہوئی نظر آرہی ہے۔ گزشتہ 15 سالوں سے مدھیہ پردیش کی اقتدار میں قابض بھارتیہ جنتا پارٹی کو دھچکا لگ سکتا ہے۔ اوپینین پول کے مطابق مدھیہ پردیش اسمبلی کی کل 230 سیٹوں میں سے بی جے پی پچھڑتی نظر آ رہی ہے۔ مدھیہ پردیش میں کانگریس کو 122 سیٹیں ملنے کا امکان ہے تو وہیں بھارتیہ جنتا پارٹی 108 کے اعداد و شمار چھوتی نظر آ رہی ہے۔واضح ہو کہ مدھیہ پردیش میں فی الحال بی جے پی کے پاس 165، کانگریس کے پاس 58، بی ایس پی کے 4 اور آزاد کے پاس 4 سیٹیں ہیں۔ مدھیہ پردیش میں 2003 سے بی جے پی کی حکومت ہے اور 2005 سے شیوراج سنگھ وزیر اعلی ہیں۔ اس سے پہلے کانگریس کی حکومت تھی، جس میں دگ وجے سنگھ 10 سال وزیر اعلی تھے۔ وہیں چھتیس گڑھ سے بھی بی جے پی کے لئے راحت کی خبر نہیں ہے۔ وہاں بھی اقتدار میں قابض بی جے پی سے آگے کانگریس نظر آ رہی ہے۔ چھتیس گڑھ کے لئے نجی ٹی وی اے بی پی نیوز سی۔ووٹر کے اوپینین پول کے مطابق، بی جے پی کو جہاں 40 سیٹیں ملتی نظر آ رہی ہیں، وہیں کانگریس 47 سیٹوں پر بی جے پی سے آگے نکلتی نظر آرہی ہے۔ اس کے ساتھ ساتھ دیگر کے کھاتے میں 3 نشستیں جانے کا امکان ہے۔واضح ہو کہ چھتیس گڑھ میں کل 90 سیٹیں ہیں۔ بی جے پی حکومت والی ریاستوں میں راجستھان کا نام بھی شامل ہے۔ راجستھان میں وسندھرا راجے کی حکومت بھی اس بار جاتی ہوئی نظر آ رہی ہے۔ راجستھان اسمبلی انتخابات کے لئے اے بی پی نیوز سی۔ووٹر کے اوپینین پول کے مطابق بھارتیہ جنتا پارٹی محض 56 سیٹوں پر سمٹتی ہوئی نظر آ رہی ہے۔ وہیں کانگریس پارٹی کے کھاتے میں 142 نشستوں کے جانے کا اندازہ لگایا گیا ہے۔ اس کے ساتھ ساتھ دیگر کے اکاؤنٹ میں دو سیٹیں جانے کا امکان ہے۔واضح ہو کہ راجستھان میں کل 200 نشستیں ہیں۔ یہ بھی غور رہے کہ ہفتہ کو الیکشن کمیشن نے پانچ ریاستوں میں ہونے والے اسمبلی انتخابات کی تاریخوں کا اعلان کیا تھا۔اس سے پہلے الیکشن کمیشن کے انتخابات کی تاریخوں کے وقت میں تبدیلی کو لے کر تنازعہ بھی ہوا اور کانگریس نے الیکشن کمیشن کی منشا اور آزادی پر سوال بھی اٹھا ئے تھے ۔